بايدن: امريکايي بمونو فلسطينيان وژلي دي
۱۴۰۳ اردیبهشت ۲۰, پنجشنبه
د امريکا متحده ایالاتو ولسمشر جو بایدن، منلې ده چې د دغه هيواد له خوا اسرائيل ته ورکړل شويو بمونو ملکي فلسطينيان وژلي دي.
بایدن د چهارشنبې په ورځ له سي ان ان شبکې سره په مرکه کې وويل: «په غزه کې ملکي وګړي د دغو بمونو په پايله او نورو هغو لارو چارو په ترڅ کې وژل شوي دي چې دوی يې په ګڼ میشتو مرکزونو کې د تعقيب په موخه خپلوي.»
بايدن وويل چې متحده ایالات اوس هم د اسرائيل دفاع ته ژمن دي او دغه هيواد ته به د « Iron Dome» يا وسپنیزې ګنبدې په نوم د لنډ واټن توغنديو خنثی کوونکي ورکړي.
خو که اسرائيل رفح ته داخل شي، امريکا به ورته يوه پوله وټاکي: «موږ به هغه وسلې او د توپخانې مهمات چې کارول شوي دي، انتقال نه کړو.»
امريکا په تکراري بڼه ويلي دي چې اسرائيل د غزې په جنوبي ښار رفح کې خپل تهاجمي عمليات باید مخته يو نه سي.
د روانې اونۍ په پېل کې د اسرائيل مشرتابه په رفح کې د پوځي عملياتو اجازه ورکړې وه چېرې چې تر ۱،۲میليونو ډېرو فلسطينيانو پناه اخيستې ده.
د اسرائيل پوځ تر هغه وروسته د دغه ښار په ختیځ کې د حماس پر هدفونو بريدونو پېل کړي دي چې د ښار د دغه برخې په زرونو اوسيدونکو ته یې له سيمې د وتلو لارښوونه کړې وه.
د اسرائيل غبرګون
په ملګرو ملتونو کې د اسرائيل سفير ګيلاد ايردن، ويلي دي چې اسرائيل ته د بایدن دا ګواښ چې که چېرې رفح ښار ته داخل شي نو د ځينو وسلو انتقال به وردوي، «ډېر مايوسه کوونکی» دی.
نوموړي د اسرائيل له دولتي شبکې کان راډيو سره په مرکه کې د بایدن خبرداري ته د اسرائيل د لومړي غبرګون په توګه وويل: «دا يوه ستونزمنه او ډېره مایوسه کوونکې خبره ده چې سړی یې د يوه داسې ولسمشر له خولې اوري چې د جګړې له پېل راهېسې یې موږ منندوی يو.»
ب. ص/ ن. ز (آژانسونه)
زموږ له آرشيف څخه: